చిరు తెలంగాణ పర్యటనపై ఆసక్తి

హైదరాబాద్: ప్రజారాజ్యం పార్టీ అధినేత చిరంజీవి తెలంగాణ జిల్లాల పర్యటనపై ఆసక్తి నెలకొంది. దీపావళి పర్వదినానికి ముందే ఆయన తెలంగాణలోని కరీంనగర్, వరంగల్ జిల్లాల్లో ఆయన పర్యటించునున్నారు. ఆయన తెలంగాణ జిల్లాల పర్యటన ఈ నెల 22న గానీ, 23న గానీ ప్రారంభం కావచ్చు. ఈ పర్యటనలో ప్రత్యేక తెలంగాణపై చిరంజీవి ఏ విధమైన ప్రకటన చేస్తారనే విషయంపై ఆసక్తి ఏర్పడింది.

ఉత్తరాంధ్ర పర్యటనకు ముందు చిరంజీవి పోలేపల్లి, సిరిసిల్ల, గంగదేవి పల్లి గ్రామాలను సందర్శించారు. ఈ మూడు కూడా తెలంగాణలోనే ఉన్నాయి. పార్టీలో అధ్యయనం తర్వాతనే తెలంగాణపై తమ వైఖరిని వెల్లడిస్తామని చిరంజీవి తిరుపతి బహిరంగ సభలో చెప్పారు. అయితే, ప్రజలు కోరుకుంటే తెలంగాణ రాష్ట్ర ఏర్పాటుకు సహకరిస్తామని కూడా ఆయన చెప్పారు. నిజానికి దీపావళి తర్వాత చిరంజీవి మలి విడత ప్రజా అంకిత యాత్ర ప్రారంభమవుతుందని భావించారు. అయితే దీపావళికి ముందు తెలంగాణ జిల్లాల్లో పర్యటించాలని ఆయన నిర్ణయించుకున్నారు.