ఎంఎన్ఎస్ చీఫ్ రాజ్ థాకరే అరెస్టు

ముంబయి: మహారాష్ట్ర నవనిర్మాణ సేన చీఫ్ రాజ్ థాకరేను పోలీసులు ఆదివారం రాత్రి పొద్దుపోయిన తర్వాత అరెస్టు చేశారు. ఆదివారం జరిగిన ఉత్తర భారత రైల్వే పరీక్షలకు హాజరైన అభ్యర్థులపై ఎంఎన్ఎస్ కార్యకర్తల దాడి కేసులో ఆయనను పోలీసులు అరెస్టు చేశారు. ఆయనపై, ఆయన అనుచరులపై ఖార్వాడీ పోలీసు స్టేషనులో కేసు నమోదైంది. స్థానికులకు సరైన ప్రాతినిధ్యం ఇవ్వడం లేదని ఆరోపిస్తూ ఎంఎన్ఎస్ కార్యకర్తలు ముంబయి శివార్లలోని 13 రైల్వే బోర్డు పరీక్షల కేంద్రాలపై ఆదివారంనాడు దాడులు చేశారు.

పశ్చిమ మహారాష్ట్రలో, కొంకణ్ ప్రాంతంలో పర్యటిస్తున్న రాజ్ థాకరేను పోలీసులు రత్నగిరి జిల్లాలో అరెస్టు చేశారు. ఆయనను బాంద్రా కోర్టులో హాజరు పరిచే అవకాశం ఉంది. ఉత్తర భారతీయులపై దాడిని రాజ్ థాకరే అంతకు ముందు సమర్థించుకున్నారు. తన అరెస్టు వల్ల సంభవించే పరిణామాలను ప్రభుత్వం రుచి చూస్తుందని ఆయన అన్నారు. రాజ్ ను అరెస్టు చేస్తే మహారాష్ట్ర అట్టుడుకుతుందని ఆయన అన్నారు. కాగా, ముంబయి ఎంఎన్ఎస్ కార్యకర్తలు విధ్వంసానికి దిగినట్లు వార్తలు వస్తున్నాయి.