చిరుతో అసమానతలు మాయం: పవన్

హైదరాబాద్: అన్నయ్య చిరంజీవితోనే సామాజిక న్యాయం సాధ్యమని ప్రజారాజ్యం పార్టీ నాయకుడు, సినీ హీరో పవన్ కళ్యాణ్ అన్నారు. కరీంనగర్, వరంగల్, నల్లగొండ పార్టీ ప్రతినిధులను ఉద్దేశించి ఆయన మంగళవారం మాట్లాడారు. చిరంజీవితోనే సమాజంలోని అన్ని వర్గాలకు న్యాయం జరుగుతుందని ఆయన చెప్పారు. చట్టసభల్లో కులవృత్తుల గురించి ప్రస్తావించే నాయకుడే లేకుండా పోయాడని ఆయన ఆవేదన వ్యక్తం చేశారు.

స్వాతంత్ర్యం వచ్చి 60 ఏళ్లయినా రాష్ట్రంలో ఆకలిచావులు జరుగుతున్నాయని, ప్రభుత్వాలకు చిత్తశుద్ధి ఉంటే ఆకలి చావులను నిరోధించవచ్చునని ఆయన అన్నారు. గత నాయకులు ప్రజలకు ఇచ్చిన హామీలను అమలు చేయకపోవడం వల్లనే ఉద్యమాలు తలెత్తుతున్నాయని ఆయన అన్నారు. మదర్ థెరిస్సా, అంబేడ్కర్, ఫూలే స్ఫూర్తితో ప్రజారాజ్యం పార్టీ పనిచేస్తుందని ఆయన అన్నారు.