నా మిత్రుల్లో అందరూ ఉన్నారు: వైయస్

హైదరాబాద్: తెలంగాణ అంశాన్ని తమ పార్టీ అధ్యక్షురాలు సోనియా గాంధీకి వదిలేశామని, దాంతో దానిపై తాము ఏమీ మాట్లాడకూడదని అనుకున్నామని ముఖ్యమంత్రి వైయస్ రాజశేఖర రెడ్డి అన్నారు. ఒక ప్రైవేట్ తెలుగు టీవీ చానెల్ కార్యక్రమంలో ఆయన ఆ మాటలన్నారు. తనకు తెలంగాణ అనుకూలంగా వ్యవహిరించే మిత్రులున్నారు, తెలంగాణకు వ్యతిరేకంగా మాట్లాడుతున్న మిత్రులున్నారని ఆయన ఒక ప్రశ్నకు సమాధానంగా అన్నారు.

తాము మైనారిటీలను బుజ్జగించడం లేదని, వారికి రక్షణ కల్పిస్తున్నామని ఆయన అన్నారు. ఎన్నికల ప్రణాళికలో ఇచ్చిన హామీ మేరకు ముస్లింలకు రిజర్వేషన్లు కల్పించినట్లు ఆయన తెలిపారు. తాను అవినీతి ఆరోపణలను విని పారిపోలేదని, విచారణలు జరిపించానని ఆయన చెప్పారు. తెలుగుదేశం పార్టీ అధ్యక్షుడు నారా చంద్రబాబునాయుడు అవినీతి ఆరోపణలు చేయడం దయ్యాలు వేదాలు వల్లించినట్లుందని ఆయన వ్యాఖ్యానించారు. కోస్తా కారిడార్ అనే ప్రతిపాదనే లేదని ఆయన స్పష్టం చేశారు. వేయి కోట్ల కుంభకోణం జరిగిందని చేస్తున్న ఆరోపణలకు సాక్ష్యాలు లేవని ఆయన అన్నారు.