తెలంగాణకు వైయస్సే అడ్డంకి: గద్దర్

హైదరాబాద్: తెలంగాణ రాష్ట్ర ఏర్పాటుకు ముఖ్యమంత్రి డాక్టర్ వైయస్ రాజశేఖర రెడ్డే అడ్డంకిగా ఉన్నారని ప్రముఖ వాగ్గేయకారుడు గద్దర్ అన్నారు. తెలంగాణ రాష్ట్ర ఏర్పాటుకు పార్లమెంటులో బిల్లు ప్రవేశపెట్టాలని డిమాండ్ చేస్తూ బుధవారం నిరాహార దీక్ష చేపట్టిన ఉస్మానియా విశ్వవిద్యాలయం న్యాయశాస్త్రం విద్యార్థులను ఆయన పరామర్శించారు. తెలంగాణ రాష్ట్ర ఏర్పాటుకు వెంటనే చర్యలు తీసుకోవాలని ఆయన యుపిఎ ప్రభుత్వాన్ని డిమాండ్ చేశారు.

రాష్ట్రపతి ప్రసంగంలో హామీ ఇచ్చినట్లు ఐక్య ప్రగతిశీల కూటమి (యుపిఎ) ప్రభుత్వం ఈ శీతాకాలం పార్లమెంటు సమావేశాల్లో తెలంగాణ రాష్ట్రం ఏర్పాటుకు బిల్లు ప్రతిపాదించాలని ఆయన కోరారు. తెలంగాణ రాష్ట్రం ఏర్పాటుకు విద్యార్థులు శాంతియుతంగా ఉద్యమాన్ని ఉధృతం చేయాలని ఆయన సూచించారు.