విహెచ్ తో గొడవ అబద్ధం: లగడపాటి

న్యూఢిల్లీ: పార్లమెంటు సెంట్రల్ హాల్లో తాను, తన సహచర పార్లమెంటు సభ్యుడు వి. హనుమంతరావు గొడవ పడినట్లు వచ్చిన వార్తల్లో నిజం లేదని కాంగ్రెస్ పార్లమెంటు సభ్యుడు లగడపాటి రాజగోపాల్ అన్నారు. తనపై అన్ని వైపుల నుంచి విమర్శలు వస్తుండడంతో లగడపాటి రాజగోపాల్ వెనక్కి తగ్గినట్లు కనిపిస్తున్నారు. మీడియాలో వచ్చిన వార్తలు సత్యదూరమని ఆయన బుధవారం మీడియా ప్రతినిధులతో అన్నారు. తాము కాంగ్రెసువాదులమని, తాము తమ కర్తవ్యాలను నిర్వరిస్తామని ఆయన చెప్పారు. తాము కలిసికట్టుగా పార్టీ బాధ్యతలను నిర్వరిస్తామని ఆయన చెప్పారు.

ఇదిలా ఉంటే, లగడపాటి రాజగోపాల్ వ్యాఖ్యలకు నిరసనగా వి. హనుమంతరావు అనుచరులు బుధవారం హైదరాబాదులో ఆందోళనకు దిగారు. లగడపాటి రాజగోపాల్ కు వ్యతిరేకంగా నినాదాలు చేశారు. ఆయన దిష్టిబొమ్మను దగ్ధం చేశారు. లగడపాటి రాజగోపాల్ ను పార్టీ నుంచి సస్పెండ్ చేయాలని వారు పార్టీ నాయకత్వాన్ని డిమాండ్ చేశారు. లగడపాటి రాజగోపాల్, వి. హనుమంతరావు ఇటీవల పార్లమెంటు సెంట్రల్ హాల్లోనే అందరూ చూస్తుండగా గొడవ పడ్డారు. పరస్పరం దూషించుకున్నారు. నువ్వెంత అంటే నువ్వెంత అని అనుకున్నారు.