సల్మాన్ లో పరిపక్వత లేదు: షారూఖ్

ముంబయి: బాలీవుడ్ నటి కత్రినా కైఫ్ జన్మదిన వేడుకల సందర్భంగా సల్మాన్ ఖాన్ వ్యవహరించిన తీరుపై బాలీవుడ్ బాదుషా షారూఖ్ ఖాన్ ఎట్టకేలకు మౌనం వీడారు. సల్మాన్ కు, తనకు మధ్య ఏ విధమైన సారూప్యత లేనప్పటికీ రెండు దశాబ్దాల పాటు మిత్రులుగా ఉన్నామని ఆయన ఒక వార్తాపత్రికకు ఇచ్చిన ఇంటర్వ్యూలో అన్నారు. సల్మాన్ ఖాన్ పూర్తి అపరిపక్వతతో వ్యవహరించారని ఆయన వ్యాఖ్యానించారు. తాను తండ్రిలాగా ఆలోచిస్తే, సల్మాన్ పిల్లవాడిలా ఆలోచిస్తాడని ఆయన అన్నారు.

ఇద్దరు తిరిగి కలుసుకునే అవకాశం ఉందా అని అడిగితే తామిద్దరం తమ తమ సొంత ప్రపంచాల్లో హాయిగా ఉన్నామని ఆయన సమాధానమిచ్చారు. తాము మళ్లీ కలిస్తే మంచిదే కానీ కలుసుకోకపోతే మరీ మంచిదని ఆయన వ్యాఖ్యానించారు. వీరిద్దరి మధ్య గొడవతో బాలీవుడ్ రెండుగా విడిపోయింది. షారూఖ్ సన్నిహితులతో సల్మాన్ తన సంబంధాలను తెంచుకున్నారు.