సిఎం బాబు, తర్వాత బాబాయి: తారకరత్న

గుంటూరు: కాబోయే ముఖ్యమంత్రి చంద్రబాబేనని తారకరత్న వ్యాఖ్యానించారు. గుంటూరులో నిర్వహించనున్న యువగర్జన సదస్సు ఏర్పాట్లను శుక్రవారం ఆయన పరిశీలించారు. అనంతరం విలేఖరులతో మాట్లాడారు. తనకు మామయ్య చంద్రబాబు, బాబాయి బాలకృష్ణ రెండు కళ్లలాంటి వారన్నారు. యువగర్జనకు ఎన్టీఆర్‌ తప్పకుండా హాజరవుతారన్నారు.

కాబోయే సీఎం బాలకృష్ణ అని తాను అనలేదని, అదంతా మీడియా సృష్టేనని అన్నారు. భవిష్యత్తులో బాలయ్య సీఎం అవుతారని అన్నానని, అది ఖాయమని తారకరత్న స్పష్టం చేశారు. వచ్చే ఎన్నికల్లో తాను పోటీచేయనని, గర్జన ఏర్పాట్లను పరిశీలించాలని బాబాయి ఆదేశించడంతో వచ్చానన్నారు. అంతకుముందు గుంటూరులో నందమూరి అభిమానుల ర్యాలీకి అనూహ్యస్పందన లభించింది. 4 గంటలపాటు సాగిన ర్యాలీకి అభిమానులు నీరాజనాలు పలికారు.

తెలుగు యువత నేతతో అభిమానుల ఘర్షణ జిల్లా తెలుగుయువత అధ్యక్షుడు శ్రీనివాస్‌తో నందమూరి అభిమానులు ఘర్షణ పడ్డారు. తారకరత్న ఎదుటే శ్రీనివాస్‌పై అభిమానులు చేయి చేసుకున్నారు. ఆయన కూడా వారిని కొట్టారు. దీంతో ర్యాలీలో ఉద్రిక్త పరిస్థితి నెలకొంది. చివరకు అభిమాన సంఘాల నాయకులు జోక్యం చేసుకుని తారకరత్న వాహనంపై శ్రీనివాస్‌ను కూర్చోనివ్వడంతో వివాదం సద్దుమణిగింది.