ఆస్తి తగాదా: కెఎ పాల్ అరెస్టు

విశాఖపట్నం: క్రైస్తవ మత గురువు, ప్రజాశాంతి నాయకుడు కె.ఎ. పాల్ ను విశాఖపట్నం పోలీసులు గురువారంనాడు అరెస్టు చేశారు. సోదరుడు డేవిడ్ రాజుతో ఆస్తి వివాదంలో పోలీసులు ఆయనను అరెస్టు చేశారు. మూడు గంటల హై డ్రామా అనంతరం ఈ అరెస్టు జరిగింది. పాల్ తో పాటు అతని అనుచరులిద్దరని కూడా పోలీసులు అరెస్టు చేశారు. విశాఖపట్నంలోని చర్చిలోనికి వెళ్లి డేవిడ్ రాజు తలుపులు వేసి తాళం వేసుకున్నాడు. హైదరాబాదు నుంచి వచ్చిన పాల్ ఇది గమనించి పిట్టగోడ ఎక్కి నిరసన తెలియజేశారు.

గోడ దిగి రావాలని పోలీసులు ఎంత చెప్పినా పాల్ వినలేదు. గోడపై నుంచి దూకి లోనికి ప్రవేశించడానికి పాల్ ప్రయత్నించారు. దీంతో పోలీసులు పాల్ ను అరెస్టు చేశారు. తాను గోడ మీది నుంచి దూకుతానని కూడా పాల్ పోలీసులను బెదిరించాడు. ముఖ్యమంత్రి డాక్టర్ వైయస్ రాజశేఖర రెడ్డి, మంత్రి బొత్సా సత్యనారాయణ తన సోదరుడు డేవిడ్ రాజును తనపైకి కక్షపూరితంగా రెచ్చగొడుతున్నారని పాల్ ఆరోపించారు. తాను పార్టీ విలేకరుల సమావేశాలెన్నో ఇక్కడే ఏర్పాటు చేశానని, ఈ ఆస్తి తనదేనని పాల్ అన్నారు