రాజకీయాల్లోకి రజనీ అడుగులు?

చెన్నై: తమిళనాడు సూపర్ స్టార్ రజనీకాంత్ రాజకీయాల్లోకి ప్రవేశించడానికి రంగం సిద్ధం చేసుకుంటున్నట్లే ఉన్నారు. తన అభిమానుల నుంచి ఒత్తిడి పెరుగుతుండడంతో అందుకు ఆయన నిర్ణయం తీసుకుంటారనే సంకేతాలు అందుతున్నాయి. అభిమానులను కలుసుకోవడానికి తాను రాష్ట్రవ్యాప్త పర్యటన చేస్తానని ఆయన సోమవారం చెప్పారు. చాలా కాలం తర్వాత ఆయన రాఘవేంద్ర కళ్యాణ మండపంలో తన అభిమానుల క్లబ్ సభ్యులతో సమావేశమయ్యారు. అయితే ఇప్పటి వరకు తన రాజకీయ రంగ ప్రవేశం గురించి ఆయన స్పష్టం చేయలేదు. అది సమయాన్ని, దైవేచ్ఛను బట్టి ఉంటుందని చెబుతూ వచ్చారు.

రాజకీయాల్లో విజయాన్ని పరిస్థితులే నిర్ణయిస్తాయని ఆయన అన్నారు. అయితే దాని గురించి ఆయన వివరించలేదు. తన అభిమానుల క్లబ్బులను పెంచడంతో పాటు వారి కోసం పలు సంక్షేమ కార్యక్రమాలను అమలు చేస్తానని ఆయన చెప్పారు. ప్రస్తుతం తన దృష్టిని పూర్తిగా ఎడిరాన్ సినిమాపైనే కేంద్రీకరించానని, విడుదలైన వెంటనే దేశవ్యాప్తంగా చర్చకు దారి తీస్తుందని, ఇప్పటి వరకు అంతటి భారీ సినిమా నిర్మితం కాలేదని ఆయన అన్నారు. హొగెనకల్ వివాదంపై తాను కన్నడ ప్రజలకు క్షమాపణ చెప్పలేదని, విచారం మాత్రమే వ్యక్తం చేశానని ఆయన చెప్పారు.