ఎన్టీఆర్ కు కాల్షీట్ల సమస్య: తారకరత్న

హైదరాబాద్: సినిమా కాల్షీట్లు కుదరకపోవడం వల్లనే జూనియర్ ఎన్టీఆర్ గుంటూరు యువగర్జన సదస్సుకు రావడం లేదని నందమూరి హీరో తారకరత్న అన్నారు. యువగర్జనకు రావడానికి జూనియర్ ఎన్టీఆర్ కూడా ప్రయత్నిస్తున్నారని, కాల్షీట్లు కుదిరితే తప్పకుండా వస్తారని ఆయన ఒక ప్రైవేట్ టీవీ చానెల్ కార్యక్రమంలో అన్నారు. ఈసారి రాకున్నా తర్వాతి కార్యక్రమాలకు తప్పకుండా వస్తారని ఆయన చెప్పారు. తామంతా కలిసే ఉన్నామని ఆయన చెప్పారు.

క్రియాశీలక రాజకీయాల్లోకి రావాల్సిన సమయం బాలకృష్ణకు ఇప్పుడు వచ్చిందని ఆయన చెప్పారు. తామంతా బాబాయ్ బాలకృష్ణతో ఉంటామని ఆయన చెప్పారు. తాము తమ తాత ఎన్టీఆర్ స్ఫూర్తితో పని చేస్తామని ఆయన చెప్పారు. తమది వ్యక్తిపూజ కాదని, ఎన్టీఆర్ కు తమది స్మృతి, అభిమానం అని ఆయన అన్నారు. తాము వారసులమని చెప్పుకోలేదని, తాతగారి పేరు నిలబెట్టడమే తమ ఆశయమని ఆయన చెప్పారు.