తెలంగాణకు గోదావరీ అడ్డమే: వైయస్

హైదరాబాద్: తెలంగాణ రాష్ట్ర ఏర్పాటుకు గోదావరి జలాల వివాదం కూడా అడ్డంకిగా ఉందని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. అనేక సమస్యలు తెలంగాణ రాష్ట్ర ఏర్పాటుకు అడ్డంకిగా ఉన్నాయని ఆయన అన్నారు. అందువల్లనే తెలంగాణ రాష్ట్రం ఏర్పాటులో జాప్యం జరుగుతోందని ఆయన ఒక ప్రైవేట్ తెలుగు టీవీ చానెల్ కార్యక్రమంలో అన్నారు. ప్రస్తుతం ఖమ్మ జిల్లాలో ఉన్న భద్రాచలం డివిజన్ 1956కు ముందు తూర్పు గోదావరి జిల్లాలో ఉండేదని అంటున్నారని, ఈ విషయం తనకు కూడా సరిగా తెలియదని, అయితే తమను తూర్పు గోదావరి జిల్లాలో కలపాలని భద్రాచలం డివిజన్ నుంచి డిమాండ్లు వస్తున్నాయని ఆయన అన్నారు.

తెలంగాణ ఏర్పాటుకు రెండో ఎస్సార్సీ ఇప్పుడు తమ విధానం కాదని ఆయన చెప్పారు. రెండో ఎస్సార్సీ వద్దనడం వల్ల ఏకాభిప్రాయ సాధనకు తమ పార్టీ పూనుకున్నదని ఆయన చెప్పారు. ప్రస్తుతం ఏకాభిప్రాయ సాధన ద్వారానే తెలంగాణ రాష్ట్రాన్ని ఏర్పాటు చేయాలనే ఆలోచన సాగుతోందని ఆయన చెప్పారు. అయితే తెలంగాణ రాష్ట్రం ఏర్పాటు విషయంలో అనేక భయాలు, అనుమానాలు ఉన్నాయని, వాటిని పరిగణనలోకి తీసుకోవాల్సి ఉంటుందని ఆయన అన్నారు.