ఒబామాకు తొలి విజయం

వాషింగ్టన్: అమెరికా అధ్యక్ష పదవికి జరుగుతున్న ఎన్నికల్లో డెమొక్రటిక్ అభ్యర్థి బరాక్ ఒబామాకు తొలి విజయం దక్కింది. మంగళవారం జరగనున్న ఎన్నికల్లో ఒబామా ముందంజలో ఉన్నట్లు సర్వేలు వెల్లడిస్తున్నాయి. న్యూహాంప్ షైర్ లోని డిక్షివిల్లి నాచ్ లో ఒబామా 21 ఓట్లలో 15 ఓట్లు కైవసం చేసుకున్నారు. 1968 నుంచి ఆ గ్రామ ప్రజలు డెమొక్రటికన్లకు ఓటు చేయడం ఇదే ప్రథమం. ఒబామా ప్రత్యర్థి రిపబ్లికన్ అభ్యర్థి మెక్ కెయిన్ కు కేవలం ఆరు ఓట్లు మాత్రమే వచ్చాయి.

ఆ గ్రామంలో వందశాతం ఓట్లు పోలయ్యాయి. దేశంలో అన్ని ప్రాంతాల కన్నా ముందు ఇక్కడ పోలింగ్ జరగడంతో మీడియా దృష్టి అంతా ఇక్కడే కేంద్రీకృతమైంది. 1968లో డెమొక్రటిక్ అభ్యర్థి హ్యూబర్ట్ హంఫ్రే రిచర్డ్ నిక్సన్ పై విజయం సాధించారు. ఆ తర్వాత ఇక్కడ డెమొక్రటికన్లను ఓటర్లు ఆదరించలేదు. గత రెండు ఎన్నికల్లోనూ జార్జి బుష్ విజయం సాధించారు.