మతంతో తెలంగాణకు బ్రేకులా?: వెంకయ్య

హైదరాబాద్: మతాన్ని అడ్డు పెట్టుకుని కాంగ్రెసు పార్టీ తెలంగాణ రాష్ట్ర ఏర్పాటును అడ్డుకోవాలని ప్రయత్నిస్తోందని భారతీయ జనతా పార్టీ (బిజెపి) సీనియర్ నాయకుడు ఎం. వెంకయ్యనాయుడు విమర్శించారు. కాంగ్రెస్ పార్టీ ప్రతి దాన్ని మతంతో, ఓట్లతో ముడి పెడుతోందని ఆయన వ్యాఖ్యానించారు. ఈ నెల 13వ తేదీన తమ పార్టీ అగ్రనేత ఎల్. కె. అద్వానీ సంకల్పయాత్ర ఏర్పాట్లను ఆయన మంగళవారం సమీక్షించారు. మజ్లీస్ పార్టీని అడ్డుపెట్టుకుని కాంగ్రెస్ పార్టీ తెలంగాణ రాష్ట్ర ఏర్పాటును అడ్డుకోవాలని కాంగ్రెస్ ప్రయత్నిస్తోందని ఆయన అన్నారు.

తెలంగాణ రాష్ట్రం ఏర్పడితే ఏమవుతుంది, పాకిస్తాన్ అవుతుందా, కాదని, తెలంగాణ రాష్ట్రం మాత్రమే ఏర్పడుతుందని ఆయన అన్నారు. మతఛాందసవాది అయిన కాశిం రజ్వీ వారసత్వాన్ని కొనసాగిస్తున్న మజ్లీస్ పార్టీని తెలంగాణకు కాంగ్రెసు అడ్డుపెడుతోందని ఆయన అన్నారు. కాంగ్రెస్ ఆటలు సాగవని ఆయన అన్నారు. హైదరాబాదులో ఉగ్రవాదులను ఏరిపారేయాల్సి ఉందని, ఈ పని బిజెపితో మాత్రమే సాధ్యమవుతుందని ఆయన అన్నారు.