రాష్ట్రంలో అమెరికా ఫలితాలు: చిరు

వరంగల్: ప్రజలు సామాజిక న్యాయాన్ని కోరుకుంటున్నారని ప్రజారాజ్యం అధినేత చిరంజీవి అన్నారు. అమెరికా ప్రజలు సామాజిక న్యాయాన్ని కోరుకుని ఒబామాను గెలిపించినట్లే తమ రాష్ట్ర ప్రజలు కూడా సామాజిక న్యాయాన్ని అందించే తమ పార్టీని గెలిపిస్తారని ఆయన అన్నారు. ఖమ్మం జిల్లాలో ఆయన గురువారం తన ప్రజా అంకిత యాత్ర సాగింది. నాయకుల ఇష్టారాజ్యానికి ప్రజలు చరమగీతం పాడబోతున్నారని, ప్రజారాజ్యం పార్టీకి పట్టం కడతారని ఆయన అన్నారు.

రాష్ట్రంలో సామాజిక న్యాయం సాధ్యమవుతుందని, నల్లజాతీయుడు అమెరికా అధ్యక్షుడవుతాడని అనుకోలేదని, తెల్లవారు కూడా సామాజిక న్యాయం కోరి ఒబామాను గెలిపించారని, ఇది విప్లవమని, ఇది రాష్ట్రంలో కూడా వచ్చి తీరుతుందని ఆయన అన్నారు. మనదేశంలో కూడా సామాజిక న్యాయం అమలు కావాల్సిందేనని ఆయన అన్నారు.