చిరుపై జోగయ్య కోపం?

హైదరాబాద్: "గాలి ఉందో లేదో, నాకైతే డౌటే" అంటూ ప్రజారాజ్యం సీనియర్ నాయకుడు చేగొండి హరిరామ జోగయ్య చిరంజీవికి లేఖ రాసినట్టు ఒక పత్రిక ప్రత్యేక వార్తను ప్రచురించడం సంచలనం సృష్టిస్తోంది. "ఏవేవో ఊహించుకుంటూ ప్రయాణం చేస్తున్నాం. అసలు గాలి వీస్తోందా? లేక మనం సృష్టించాలా? మిమ్మల్ని చూడడానికి వచ్చే వాళ్ళంతా ఓట్లేస్తారా?" అని జోగయ్య ఆ లేఖలో రాసినట్టు ప్రచారం జరుగుతోంది.

కాంగ్రెస్ పార్టీ నుంచి ఎస్సీలను వేరు చేసేందుకు మన వద్ద ప్రణాళిక ఉందా? మీరంటున్న సామాజిక న్యాయం జనానికి ఎక్కిందా? ప్రభుత్వ సంక్షేమ, అభివృద్ధి పథకాల ముందు మన నినాదం నిలుస్తుందా? అని ఆ లేఖలో జోగయ్య చిరంజీవిని సూటిగా ప్రశ్నించినట్టు తెలుస్తోంది. పార్టీ సంస్ధాగత వ్యవహారాల మీద జోగయ్య తీవ్ర అసంతృప్తితో ఉన్నారు.

పార్టీ సరైన మార్గంలో పయనించడం లేదని ఆయన ఎత్తి చూపారు. కాంగ్రెస్ ఎంపీ అయిన హరిరామజోగయ్య ఆ పార్టీని విడిచి చిరంజీవి ప్రజారాజ్యం పార్టీలో చేరారు. చిరు పార్టీలో చేరిన అతి పెద్ద నాయకుడు ఆయనే. ఆయన ప్రజారాజ్యం పార్టీ వ్యహారాలతో సంతృప్తిగా లేరన్న వార్త సంచలనం సృష్టిస్తోంది.