రామ్ చరణ్ సినీ రీల్ మాయం

హైదరాబాద్: ప్రజారాజ్యం అధినేత చిరంజీవి తనయుడు రామ్ చరణ్ తేజా నటిస్తున్న కొత్త సినిమా రీళ్లు మాయమయ్యాయి. గీతా అర్ట్స్ పతాకంపై ఈ సినిమా నిర్మాణం జరుగుతోంది. రామ్ చరణ్ తేజా నటిస్తున్న రెండో చిత్రం ఇది. ఈ సినిమాపై భారీ అంచనాలున్నాయి. రామోజీ ఫిల్మ్ సిటీ కలర్ ల్యాబ్ నుంచి ఈ సినిమా రీళ్లు మాయమయ్యాయి. కలర్ ల్యాబ్ మేనేజర్ ఈ విషయంపై హయత్ నగర్ పోలీసులకు ఫిర్యాదు చేశారు. సెక్యూరిటీ సిబ్బందిపై అనుమానాలు వ్యక్తమవుతున్నాయి.

మాయమైన రీళ్లు అంత ముఖ్యమైనవి కావని చెబుతున్నారు. మామూలుగా 2,4 లక్షల రీళ్లు ఎక్స్ పోజ్ చేస్తారని, అలా ఎక్స్ పోజ్ చేసిన రీళ్లే మాయమయ్యాయని అంటున్నారు. ఈ సినిమా నిర్మాణం 60, 70 శాతం పూర్తయింది. బహుశా సంక్రాంతి పండుగకు ఈ సినిమా విడుదలయ్యే అవకాశం ఉందని భావిస్తున్నారు. ఈ చిత్రానికి ప్రముఖ దర్శకుడు రాజమౌళి దర్శకత్వం వహిస్తున్నారు.