వైయస్ కు వేయి కోట్ల ముడుపులు: బాబు

హైదరాబాద్: చేవెళ్ల, ప్రాణహిత ప్రాజెక్టులో ముఖ్యమంత్రి డాక్టర్ వైయస్ రాజశేఖర రెడ్డి వేయి కోట్ల రూపాయల ముడుపులు ముట్టాయని తెలుగుదేశం పార్టీ అధ్యక్షుడు నారా చంద్రబాబునాయుడు విమర్శించారు. రంగారెడ్డి జిల్లా రోడ్ షోలో ఆయన గురువారం ప్రసంగించారు. ముఖ్యమంత్రి డాక్టర్ వైయస్ రాజశేఖర రెడ్డి ప్రజలను దగా చేస్తున్నారని ఆయన అన్నారు. తాము అధికారంలోకి వస్తే ముస్లింలకు రాజకీయాల్లో నాలుగు శాతం రిజర్వేషన్లు కల్పిస్తామని ఆయన హామీ ఇచ్చారు.

మహిళలకు ఉచితంగా గ్యాస్ సిలిండర్ ఇస్తామని కూడా ఆయన వాగ్దానం చేశారు. యువతకు తాము ఎస్ అనే పథకాన్ని చేపడుతామని, నిరుద్యోగాన్ని రూపుమాపుతామని ఆయన చెప్పారు. నిరుద్యోగులకు నెలకు వేయి రూపాయలేసి భృతి పెంచుతామని ఆయన చెప్పారు. వైయస్ ప్రభుత్వం అన్ని వర్గాల ప్రజలను మోసం చేస్తోందని ఆయన అన్నారు. అనంతరం ఆయన మహబూబ్ నగర్ జిల్లా కోస్గిలో తలపెట్టిన మహాధర్నాకు బయలుదేరారు.