అది మా విజయమే: అల్లు అరవింద్

హైదరాబాద్‌: మహాత్మా జ్యోతిబా ఫూలే ప్రభుత్వానికి ఇన్నాళ్లకు గుర్తు రావడం తమ పార్టీ సాధించిన విజయమేనని ప్రజారాజ్యం పార్టీ నాయకుడు అల్లు అరవింద్ అన్నారు. ప్రజారాజ్యం పార్టీ పుట్టిన తర్వాత ఎన్నో నైతిక విజయాలు సాధించిందని ఆయన అన్నారు. రాజకీయ ప్రయోజనం కోసమే ప్రభుత్వం ఇప్పుడు ఫూలేను పట్టించుకుంటోందని ఆయన విమర్శించారు. అధికారానికి వచ్చిన నాలుగున్నర ఏళ్ల తర్వాత బిసిలకు చట్టసభల్లో రిజర్వేషన్లు కల్పించాలనే నిర్ణయం తీసుకోవాలని ప్రభుత్వం అనుకోవడం రాజకీయమేనని ఆయన అన్నారు.

బీసీల ఆత్మగౌరవ సభ పేరుతో జనవరిలో భారీ బహిరంగసభ నిర్వహిస్తామని అల్లు అరవింద్‌ చెప్పారు. రాష్ట్రవ్యాప్తంగా బీసీలు ఎదుర్కొంటున్న సమస్యలపై ఓ ప్రత్యేక కమిటీ అధ్యయనం చేసి ఆ సభలో చిరంజీవికి ఓ నివేదిక అందజేస్తుందని ఆయన శుక్రవారం హైదరాబాద్‌లో తెలిపారు. ఆ నివేదిక ఆధారంగా మేనిఫెస్టో రూపొందుతుందని తెలిపారు. నాలుగు జిల్లాల బీసీ ప్రతినిధుల సమావేశాన్ని ఆయన ప్రారంభించారు. వారంరోజుల్లో పార్టీ కమిటీల నియామకం పూర్తి చేస్తామని ఆయన వివరించారు.