ఆర్థిక మాంద్యాన్ని అధిగమిస్తాం: పిఎం

న్యూఢిల్లీ: ప్రపంచవ్యాప్తంగా నెలకొన్న ఆర్థిక సంక్షోభం ప్రభావం భారత్‌పై కొంత ఉన్నా ప్రస్తుతం సాధించిన 8 శాతం జీడీపీ వృద్ధిరేటును భారత్‌ నిలబెట్టుకుంటుందని ప్రధాని మన్మోహన్‌సింగ్‌ అన్నారు. శుక్రవారం న్యూఢిల్లీలో హిందుస్థాన్‌టైమ్స్‌ ఆధ్వర్యంలో జరిగిన నాయకత్వ సదస్సులో ఆయన ప్రారంభోపన్యాసం చేశారు. ప్రపంచ సంక్షోభ ప్రభావం మనపై లేదని మనం ఆత్మవంచన చేసుకోలేమని, అయితే ఆర్థికసంక్షోభాన్ని ఎదుర్కొనేందుకు, అందుకు తగిన వ్యూహాలను రూపొందించుకునేందుకు కావలసిన నిపుణులు, అవసరమైన వనరులు మనకు పుష్కలంగా ఉన్నాయని ఆయన స్పష్టం చేశారు.

ప్రపంచ దేశాలన్నీ నేడు ఒకే నావలో ప్రయాణం చేస్తున్నాయని పరస్పర సహకారంతో దీన్ని అధిగమించాలని ఇటీవల జరిగిన జి-20 దేశాల సమావేశంలో కూడా నిర్ణయించారని ఆయన అన్నారు. దేశంలో ప్రస్తుతం మరో గొప్ప ప్రమాదం పొంచిఉందని, మతం పేరుతో తీవ్రవాద రాజకీయాలు సాగుతున్నాయని ఇది అవాంఛనీయ పరిణామమని ఆయన ఆందోళన వ్యక్తం చేశారు. ప్రభుత్వం ఆర్థిక మాంద్యాన్ని ముందే పసిగట్టిందని, అందుకు తగిన విధంగా బడ్జెట్ లో చర్యలు తీసుకుందని ఆయన తన ప్రసంగం తర్వాత వచ్చిన ఒక ప్రశ్నకు సమాధానంగా చెప్పారు.