రామోజీకి సుమన్ 'సాక్షి' పోటు

హైదరాబాద్: ఈనాడు గ్రూపు సంస్థల అధినేత రామోజీరావుపై కుమారుడు సుమన్ బహిరంగంగా తిరుగుబాటు ప్రకటించడం సంచలనం సృష్టించింది. తండ్రిపై విమర్శలు గుప్పిస్తూ సాక్షి దినపత్రికకు సుమన్ ఇంటర్వ్యూ ఇవ్వడం మరింత దిగ్భ్రాంతికర అంశంగా మారింది. ఈనాడుకు, సాక్షికి మధ్య పచ్చగడ్డి వేస్తే భగ్గుమంటున్న విషయం తెలిసిందే. రామోజీరావుతో సుమన్ కు విభేదాలున్నాయని గతంలో కూడా సాక్షి దినపత్రిక ఒక వార్తాకథనాన్ని ప్రచురించింది. ఇప్పుడు నేరుగా సుమన్, ఆయన మిత్రుడు ప్రభాకర్ ల ఇంటర్వ్యూ ప్రచురించడం సంచలనం రేకిత్తించింది.

తండ్రి తనను వేధించారని సుమన్ ఆ ఇంటర్వ్యూలో వివరించారు. తన రాతలు రామోజీకి నచ్చేవి కావని ఆయన చెప్పుకున్నారు. తనకు ఇహలోక జ్ఞానం కల్పించడానికి సరైన సమయంలో పంపబడ్డ దూతగా మిత్రుడు ప్రభాకర్ ను సుమన్ చెప్పుకున్నారు. ప్రభాకర్ తనకు రాముడు, లక్ష్మణ్, సీత అని అన్నారు. ప్రభాకర్ ను సుమన్ వదులుకోవడానికి సిద్ధంగా లేకపోవడం వల్లనే రామోజీ రావు కోపంగా ఉన్నట్లు సమాచారం. ఈటివీలో తమ కార్యక్రమాలు ఆగిపోయాయని, దాంతో తాము ఏమయ్యామో ప్రజలకు తెలియజేయడానికే ఇంటర్వ్యూకి అంగీకరించామని సుమన్ చెప్పుకున్నారు. రామోజీరావుతో తన పడిన కష్టాలను సుమన్ ఆ ఇంటర్వ్యూలో వివరించారు.