పర్యటన ఖరారుపై బాలయ్య గుర్రు

హైదరాబాద్‌: ప్రముఖ నటుడు బాలకృష్ణ పర్యటన డిసెంబర్ లోనే ప్రారంభమయ్యే అవకాశాలున్నాయి. తనకు తెలియకుండా తన పర్యటనను ఖరారు చేయడంపై బాలయ్య ఆగ్రహం వ్యక్తం చేసినట్లు తెలిసింది. తెలుగుదేశం పార్టీకి మద్దతుగా ఆయన ప్రజల్లోకి వెళ్లాలని నిర్ణయించుకున్న విషయం తెలిసిందే. అందులో భాగంగా ఈ నెల చివరిలో మహబూబ్‌నగర్‌ జిల్లాలో ఎన్టీఆర్‌ విగ్రహావిష్కరణల కార్యక్రమాల్లో పాల్గొనాలని తొలుత భావించారు. అయితే తాజాగా దాన్ని వాయిదా వేశారు.

ప్రస్తుతం షూటింగ్‌ కోసం బాలయ్య మలేషియాలో ఉన్నారు. బాలయ్య డిసెంబరు 11న రాష్ట్రానికి వస్తారని తెలిసింది. అనంతరం కొద్దిరోజుల తర్వాత రాయలసీమలోని కర్నూలు, కడప జిల్లాల్లో ఆయన యాత్ర ఉంటుందని పార్టీ వర్గాలు తెలిపాయి. ఈ నెల చివరిలో తెలుగుదేశం పార్టీ అధినేత చంద్రబాబు మలేషియా వెళ్లనున్నారు. అక్కడే ఉన్న బాలకృష్ణ ను ఆయన కలుస్తారు.