తెరాస మోసం చేస్తోంది: బాబు

హైదరాబాద్: కాంగ్రెస్, తెలంగాణ రాష్ట్ర సమితి (తెరాస)ప్రజలను మోసం చేస్తున్నాయని తెలుగుదేశం పార్టీ అధ్యక్షుడు నారా చంద్రబాబునాయుడు విమర్శించారు. ముఖ్యమంత్రి డాక్టర్ వైయస్ రాజశేఖర రెడ్డి ప్రభుత్వం అవినీతిలో కూరుకుపోయిందని ఆయన అన్నారు. పార్టీ విస్తృత స్థాయి సమావేశంలో ఆయన సోమవారం ప్రసంగించారు. ప్రభుత్వం ఆదర్శ రైతుల పేరిట కాంగ్రెసు కార్యకర్తలకు ఉపాధి కల్పిస్తోందని ఆయన అన్నారు. సామాన్యులు బతకలేని స్థితి ఏర్పడిందని ఆయన అన్నారు. ప్రభుత్వ ప్రజా వ్యతిరేక విధానాలపై పోరాటం చేయాలని ఆయన పార్టీ నాయకులకు, కార్యకర్తలకు పిలుపునిచ్చారు.

ప్రభుత్వ విధానాలపై ఆందోళనలు చేపట్టడం ద్వారా పార్టీని బలోపేతం చేయాలని కూడా ఆయన పిలువునిచ్చారు. ప్రభుత్వ అవకతవకలు చాలా ఉన్నాయని ఆయన అన్నారు. ప్రభుత్వ ఆర్థిక పరిస్థితి ఆందోళకరంగా ఉందని ఆయన అన్నారు. ప్రభుత్వం అప్పులు చేసిందని, ఆస్తులు అమ్మిందని, కానీ ఏమీ చేయలేకపోతోందని ఆయన అన్నారు.