తొడ కొట్టడం పౌరుషం: చిరంజీవి

హైదరాబాద్: రాజకీయాల్లో తొడ కొట్టడం, మీసాలు మెలేయడం పౌరుషానికి ప్రతీక అని ప్రజారాజ్యం పార్టీ అధినేత చిరంజీవి సమర్థించుకున్నారు. చిరంజీవి పులివెందులలో తొడ కొట్టడంపై, మీసాలు మెలేయడంపై ముఖ్యమంత్రి డాక్టర్ వైయస్ రాజశేఖర రెడ్డి తీవ్ర వ్యాఖ్యలు చేసిన విషయం తెలిసిందే. ఈ వ్యాఖ్యలపై చిరంజీవి సోమవారం మీడియా ప్రతినిధుల సమావేశంలో ప్రతిస్పందించారు. తొడ కొట్టడం, మీసాలు మెలేయడం రౌడీయిజానికి ప్రతీక కాదని, పౌరుషానికి ప్రతీక అని ఆయన అన్నారు.

తమ పార్టీలో చేరేవారిపై విమర్శలు చేయడం మంచిది కాదని ఆయన ఇతర పార్టీలకు సలహా ఇచ్చారు. తన సొంత గ్రామం మొగల్తూరుకు ఏం చేశానో పక్కన పెట్టి ముఖ్యమంత్రి డాక్టర్ వైయస్ రాజశేఖర రెడ్డి తన సొంత గ్రామం బలపనూరుకు ఏం చేశారో చెప్పాలని ఆయన డిమాండ్ చేశారు. కాంగ్రెస్ పార్టీకి రాజీనామా చేసిన పర్వతనేని ఉపేంద్ర సోమవారం చిరంజీవి సమక్షంలో ప్రజారాజ్యం పార్టీలో చేరారు.