మారెప్పపై చర్యలు తప్పవు: డిఎస్

కరీంనగర్: తెలంగాణ ప్రజలను కించపరిచిన మార్కెటింగ్ శాఖా మంత్రి మారెప్పపై చర్య తప్పదని ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్ చెప్పారు. మారెప్పపై చర్య తీసుకుంటామని ఆయన సోమవారం మీడియా ప్రతినిధుల సమావేశంలో అన్నారు. తెలంగాణ ఇస్తే బిచ్చగాడికి భగవద్గీత ఇచ్చినట్లు ఉంటుందని మారెప్ప ఆదివారం చేసిన ప్రకటనను తాను తీవ్రంగా పరిగణిస్తున్నట్లు ఆయన తెలిపారు.

మారెప్పపై ముఖ్యమంత్రి డాక్టర్ వైయస్ రాజశేఖర రెడ్డికి నివేదించనున్నట్లు ఆయన తెలిపారు. మారెప్ప మర్యాద లేకుండా మాట్లాడటం సరికాదని ఆయన అన్నారు. కేవలం దళిత నాయకుడనే ఉద్దేశంతోనే మారెప్పను సహిస్తున్నట్లు ఆయన తెలిపారు. డి. శ్రీనివాస్ జిల్లాల పర్యటనలో భాగంగా కరీంనగర్ జిల్లాలో పర్యటిస్తున్నారు. అంతకు ముందు ఆయన వరంగల్ జిల్లాలో పర్యటించారు.