కాంట్రాక్ట్ సిఎంను పెట్టుకుందాం: కెసిఆర్

ఆదిలాబాద్: ముఖ్యమంత్రి డాక్టర్ వైయస్ రాజశేఖర రెడ్డి అన్నీ కాంట్రాక్టు ఉద్యోగాలే ఇస్తున్నారని, పర్మినెంట్ ఉద్యోగాలు ఇవ్వడం లేదని, మనం కూడా కాంట్రాక్టు ముఖ్యమంత్రిని, మంత్రులను నియమించుకుందామని తెలంగాణ రాష్ట్ర సమితి(తెరాస) అధినేత కె. చంద్రశేఖర్‌రావు వ్యంగ్యంగా అన్నారు. ఆదిలాబాద్‌ జిల్లా తిర్యాణి, రెబ్బన్న, తాండూరు, బెల్లంపల్లిల్లో సోమవారం ఆయన బస్సుయాత్ర నిర్వహించారు. ముఖ్యమంత్రి తెలంగాణ ఉద్యమాన్ని మట్టుపెట్టాలని చూశారన్నారు. పార్టీని చీల్చారని, కానీ తెలంగాణ ఉద్యమం గొప్పదని, ఎవ్వరు ఏం చేసినా తెలంగాణను అడ్డుకోలేరన్నారు. ఇటీవల ఓనాయకుడు తెలంగాణను అడ్డుకోవాలంటే కేసీఆర్‌ను చంపేస్తే సరిపోతుంది కదా అని వ్యాఖ్యానించారని, కానీ తెలంగాణలోని ప్రతి గ్రామంలో 10మంది కేసీఆర్‌లు పుట్టారన్న విషయం ఆయనకు తెలియదన్నారు. తెలంగాణలోని ప్రతి గ్రామంలో ఉద్యమస్ఫూర్తి కనిపిస్తోందన్నారు. తెలంగాణ రావడం కనుచూపుమేరలోనే ఉందన్నారు. తెలంగాణ సాగునీటి ప్రాజెక్టుల పేరుతో ముఖ్యమంత్రి నిధులు దోచుకుంటున్నారని, శంకుస్థాపనలు చేసిన ప్రాజెక్టుల వద్ద తద్దినాలు, పిండాలు పెడుతున్నారన్నారు. తెలంగాణలోని కాంగ్రెస్‌ నాయకులకు ముఖ్యమంత్రిని చూస్తేనే లాగూలు(నిక్కర్లు) తడిసిపోతాయని, వారు ఇక్కడి అభివృద్ధి, ప్రజల బాగోగుల గురించి పట్టించుకోవడంలేదన్నారు. పార్టీల జెండాల పేరుతో ప్రజలను విడదీస్తున్నారని ఈ కుట్రను గమనించాలన్నారు.

తెలంగాణ ఏర్పడితే గిరిజనులకు న్యాయం జరుగుతుందని, తెలంగాణలో ఉన్న 12శాతం గిరిజనులకు రిజర్వేషన్లు పెరుగుతాయని, గిరిజనాభివృద్ధికి పటిష్ట చర్యలు తీసుకోవచ్చన్నారు. తెలంగాణ గిరిజనులు కాంగ్రెస్‌ పార్టీకి తుడుందెబ్బ రుచి చూపించాలని పిలుపునిచ్చారు. రాజకీయాల్లో చిన్నవాడైన చిరంజీవి మొదలు తెదేపా, భాజపా, వామపక్షాలు కూడా తెలంగాణకు అనుకూలమని ప్రకటించాయన్నారు. ఈనేపథ్యంలో డిసెంబరులో జరిగే పార్లమెంటు సమావేశాల్లోపు కాంగ్రెస్‌ పార్టీ తెలంగాణపై నిర్ణయం తీసుకుంటే అమృతం తాగుతుందని, లేకపోతే విషం తాగాల్సి వస్తుందన్నారు. సమైక్య రాష్ట్రంలో ఉంటే బెల్లంపల్లి, ఇల్లెందు పట్టణాలు తరలిపోతాయని, ప్రత్యేక రాష్ట్రం వస్తే ఈసమస్యలుండవన్నారు.