చిరు మీసాలు మెలేయడం పై సబిత విమర్శ

హైదరాబాద్: ప్రజారాజ్యం అధినేత చిరంజీవి రోడ్ షోలలో మీసం మెలేయడం, తొడగొట్టడం తీవ్ర అభ్యంతరకరమని, అది పురుషాహంకారానికి నిదర్శనమని రాష్ట్ర మంత్రి సబితా ఇంద్రారెడ్డి విమర్శించారు. దీనిపై చిరంజీవి క్షమాపణ చెప్పాలని ఆమె బుధవారం ఒక టీవీ చానల్ కు ఇచ్చిన ఇంటర్వ్యూలో డిమాండ్ చేశారు. మీసాలు మెలేయడం, తొడగొట్టడం సినిమా నటులకు నప్పుతుందేమో కానీ రాజకీయ నాయకులకు తగదని ఆమె అన్నారు.

"ఇంద్ర" సినిమాలో లాగా పోజులు ఇవ్వాలని ప్రజలు కోరినందువల్లనే తాను అలా చేశానని చిరంజీవి వివరణ ఇచ్చారు కదా అని గుర్తు చేయగా రాజకీయాల్లో అతి తగదని, రాజకీయమంటే సినిమా కాదని ఆమె అన్నారు. రోడ్ షో లపై హైకోర్టు స్టే విధించడం వల్ల కాంగ్రెస్ కు నష్టం లేదని, ఇంటింటికీ వెళ్ళి ప్రచారం చేసుకునే సంప్రదాయం కాంగ్రెస్ పార్టీకి ఉందని సబితా ఇంద్రారెడ్డి చెప్పారు.