అప్పగించం..అవసరమైతే విచారిస్తా:పాక్

ఇస్లామాబాద్‌: దావూద్‌, మెమన్‌, అజర్‌లను అప్పగించేది లేదని పాక్ స్పషం చేసింది. అంతేగాక ఆయా వ్యక్తులు ఉగ్రవాదానికి పాల్పడుతున్నట్లు భారత్‌ అందించే ఆధారం నిరూపిస్తే వారిపై తామే చర్య తీసుకొంటామని పాక్‌ ఓ ప్రకటనలో తెలియచేసింది. ఐతే 26/11 ముంబయి దాడులపై దర్యాప్తులో సహకరించేందుకు ఉన్నతస్థాయి బృందాన్నొకటి భారత్‌ పంపిస్తామని ప్రతిపాదించింది. ఉగ్రవాదులు దావూద్‌ ఇబ్రహీం, టైగర్‌ మెమన్‌, మౌలానా మసూద్‌ అజర్‌(జైషే మొహమ్మద్‌ వ్యవస్థాపకుడు) అప్పగింతకు న్యూఢిల్లీ చేసిన విజ్ఞప్తిపై ఇస్లామాబాద్‌ స్పందనను పాక్‌ విదేశాంగ కార్యదర్శి సల్మాన్‌ బషీర్‌ సోమవారం సాయంత్రం.. ఇక్కడి భారత హైకమిషనర్‌ సత్యబ్రత పాల్‌కు అందజేశారు.

ఆయా వ్యక్తులు ఉగ్రవాదానికి పాల్పడుతున్నట్లు భారత్‌ అందించే ఆధారం నిరూపిస్తే వారిపై తామే చర్య తీసుకొంటామని పాక్‌ అందులో స్పష్టంచేసినట్లు దౌత్యవర్గాలు ఒక వార్తాసంస్థకు వెల్లడించాయి.అలాగే నేరస్థుల అప్పగింతపై ఇరుదేశాల మధ్య ఒప్పందం లేదంటూ భారత్‌ డిమాండ్‌ను పాక్‌ తోసిపుచ్చినట్లు చెప్పాయి. ఉగ్రవాదానికి పాల్పడ్డ పాక్‌ జాతీయులపై దేశంలోని చట్టాల పరిధిలోనే చర్యలు తీసుకోవాలన్న తమ కేబినెట్‌లోని రక్షణ కమిటీ(డీసీసీ) నిర్ణయాన్నీ పాక్‌ ప్రస్తావించింది.