స్వప్నిక ఆరోగ్యం విషమంగానే...

హైదరాబాద్‌: మొన్న యాసిడ్‌ దాడికి గురై ప్రస్తుతం సికింద్రాబాద్‌ యశోదా ఆసుపత్రిలో చావుబతుకుల మధ్య కొట్టుమిట్టాడుతున్న స్వప్నిక ఆరోగ్య పరిస్థితి ఇంకా విషమంగానే ఉందని డాక్టర్లు తెలిపారు. ఇంకో రెండు మూడు రోజులైనా ఏంచెప్పలేమని, చిన్న ఇన్‌ఫెక్షన్‌ సోకినా పరిస్థితి తిరగబడే అవకాశం ఉందని వారు తెలిపారు. ఆమె కంటిచూపు గురించి ఇప్పుడే ఆలోచించలేమని కార్నియా బాగా దెబ్బతిందని వారు అన్నారు. చర్మాన్ని సరిచేసేందుకు ఆపరేషన్‌ ఏదైనా చేయగలమేమో పరిశీలిస్తున్నామని అన్నారు.

ఇక తమ పిల్లలపై అమానుషంగా దాడిచేసిన వారిపై యావత్తు రాష్ట్ర ప్రజానీకం ఆక్రోశాన్ని, ఆగ్రహాన్ని వ్యక్తం చేసిందని, వారికి తగిన శిక్ష పడాలని కోరుకున్నారని అంతా వారి కోరికమేరకే జరిగిందని యాసిడ్‌ దాడికి గురైన స్వప్నిక తల్లిదండ్రులు అన్నారు. వారికి తగిన శిక్ష పడిందని సంతోషిస్తున్నారా అని విలేకరులు అడగగా తమకు సంతోషం కాని బాధ కాని లేదని తమ బాధ అంతా తమ కూతురు గురించేనని, ఆమె చావుబతుకుల మధ్య ఉంటే తమకు వేరే ఆలోచనలు ఎలా వస్తాయని స్వప్నిక తల్లిదండ్రులు దేవేందర్‌, శ్రీలత అన్నారు. తమ పిల్లల కోసం ప్రార్థించిన అందరికీ కృతజ్ఞతలు తెలిపారు.