బుష్ పైకి జర్నలిస్టు బూట్లు

బగ్దాద్: తమ దేశ పర్యటనకు వచ్చిన అమెరికా అధ్యక్షుడు జార్జి బుష్ పైకి ఇరాక్ జర్నలిస్టు ఒకరు బూట్లు విసిరాడు. ఇరాక్ అధ్యక్షుడు నూరి ఆల్ - మాలికీతో చేతులు కలిపిన అనంతరం బుష్ ఆయనతో కలిసి విలేకరుల సమావేశంలో మాట్లాడుతుండగా ఈ సంఘటన చోటు చేసుకుంది. అయితే ఆ బూట్లు ఎవరికీ తాకలేదు. విలేకరుల సమావేశంలో మూడో వరుసలో కూర్చున్న జర్నలిస్టు ఒక్కసారిగా లేచి ఇది వీడ్కోలు ముద్దు, కుక్కా అని బుష్ ను అంటూ ఆ జర్నలిస్టు బూట్లు విసిరాడు.

మాలికీ బుష్ కు రక్షణగా వచ్చారు. ఆ తర్వాత ఇరాక్ భద్రతా సిబ్బంది ఆ జర్నలిస్టును బయటకు తీసికెళ్లారు. మొదట విసిరిన బూటు బుష్ కు దూరం నుంచి వెళ్లగా, రెండో బూటు నుంచి బుష్ కొద్దిలో తప్పించుకున్నారు. ఇరాక్ లో తమ యుద్ధం ముగిసిపోలేదని బుష్ అన్నారు. బూటు అడుగు భాగంతో కొట్టడం అరబ్ సంస్కృతిలో తీవ్రమైన అవమానంగా భావిస్తారు. బగ్దాద్ లో 2003 ఏప్రిల్ లో సద్దాం హుస్సేన్ విగ్రహాన్ని కూల్చిన తర్వాత దాన్ని బూట్ల అడుగు భాగంతో కొట్టారు.