వైయస్ ది ద్వంద్వ వైఖరి: మందకృష్ణ

హైదరాబాద్: ఎస్సీ రిజర్వేషన్ల వర్గీకరణపై ముఖ్యమంత్రి డాక్టర్ వైయస్ రాజశేఖర రెడ్డి ద్వంద్వ వైఖరి అవలంబిస్తున్నారని మాదిగ రిజర్వేషన్ పోరాట సమితి (ఎమ్మార్పీయస్) నేత మందకృష్ణ మాదిగ విమర్శించారు. వర్గీకరణకు ఈ పార్లమెంటు సమావేశాల్లోనే బిల్లును ప్రతిపాదించాలని డిమాండ్ చేస్తూ ఆయన మంగళవారం కూడా ఆమరణ నిరాహార దీక్షను కొనసాగిస్తున్నారు. ఆయన సోమవారం మధ్యాహ్నం దీక్షను ప్రారంభించారు. కేంద్ర ప్రభుత్వం బిల్లును ప్రతిపాదించేలా ముఖ్యమంత్రి డాక్టర్ వైయస్ రాజశేఖర రెడ్డి ఒత్తిడి తేవాలని ఆయన డిమాండ్ చేశారు.

మందకృష్ణ మాదిగను బిజెపి నాయకుడు కె. లక్ష్మణ్ మంగళవారం పరామర్శించారు. మందకృష్ణ ఉద్యమానికి ఆయన తన సంఘీభావాన్ని ప్రకటించారు. ప్రభుత్వం భేషిజాలకు పోకుండా వర్గీకరణ బిల్లును ప్రతిపాదించాలని ఆయన డిమాండ్ చేశారు. వర్గీకరణ బిల్లును ప్రతిపాదించాలని డిమాండ్ చేస్తూ రేపటి నుంచి జిల్లాల్లో శాంతియుతంగా ఆందోళనలు చేపట్టాలని మందకృష్ణ మాదిగ కార్యకర్తలకు పిలుపునిచ్చారు.