ఎసిబి సోదాల్లో గ్రేటర్ చేపలు

హైదరాబాద్‌: గ్రేటర్ హైదరాబాద్ నగర పాలక సంస్థ (జిహెచ్ఎంసి) అధికారుల ఇళ్లపై అవినీతి నిరోధక శాఖ (ఎసిబి) అధికారులు గురువారం ఆకస్మిక దాడులు నిర్వహించారు. వారి ఇళ్లలో నిర్వహించిన సోదాల్లో విలువైన ఆస్తులు బయటపడ్డాయి. గ్రేటర్‌ హైదరాబాద్‌ మున్సిపల్‌ కార్పొరేషన్‌లో ఖైరతాబాద్‌ సర్కిల్‌-10లో టౌన్‌ప్లానింగ్‌ సూపర్‌వైజర్‌గా పనిచేస్తున్న శ్రీనివాస్‌ ఇంటిపై ఏసీబీ అధికారులు దాడి చేసి సోదాలు నిర్వహించారు.

శ్రీనివాస్ ఇంట్లో16 లక్షల రూపాయల నగదు, 25 తులాల బంగారం, నాలుగున్నర లక్షల రూపాయల బ్యాలెన్స్‌ ఉన్న ఓ పాస్‌బుక్‌, 2 లక్షల ఫిక్స్‌డ్‌ డిపాజిట్‌ పత్రాలు స్వాధీనం చేసుకున్నారు. ఆయన ఉంటున్న ఇంటితోపాటు మరో మూడు ఇళ్లు ఉన్నట్లు కనుగొన్నారు. ఇబ్రహీంపట్నంలో 5 ఎకరాలు, గండిపేట సమీపంలో 4 ఎకరాలు, హైదరాబాద్‌ చుట్టుపక్కల 7 ఇళ్లస్థలాలు ఉన్నట్లు గుర్తించారు.నగరపాలక సంస్థ అసిస్టెంట్ ప్లానర్ శారద ఇంటిలో కూడా ఎసిబి అధికారులు సోదాలు నిర్వహించారు. అలాగే రంగారెడ్డి జిల్లా రాజేంద్రనగర్ సర్కిల్ డిసి గంగాధర్ ఇంటిలోనూ ఎసిబి అధికారులు సోదాలు చేశారు.