కోట్లు సంపాదించి..: చిరుపై వైయస్

విజయవాడ: సినిమాల ద్వారా కోట్ల రూపాయలు సంపాదించి ఇప్పుడు ప్రజా సేవ చేస్తానని నమ్మబలికే ప్రయత్నం చేస్తున్నారని ముఖ్యమంత్రి డాక్టర్ వైయస్ రాజశేఖర రెడ్డి ప్రజారాజ్యం అధినేత చిరంజీవిపై విరుచుకు పడ్డారు. ఇంగిత జ్ఞానం లేనివారంతా పార్టీలు పెడుతున్నారని ఆయన అన్నారు. గురువారం కృష్ణా జిల్లాలో ఆయన వివిధ కార్యక్రమాల్లో పాల్గొన్నారు. 60 ఏళ్లు దాటిన మహిళలకు వచ్చే సంక్రాంతి నుంచి పింఛను పథకాన్ని అమలు చేస్తామని ఆయన హామీ ఇచ్చారు.

కృష్ణా జిల్లా పర్యటనలో భాగంగా ముఖ్యమంత్రి రాజశేఖరరెడ్డి గురువారం మొదట విజయవాడ వచ్చారు. హెలికాప్టర్లో సింగ్‌నగర్‌ స్టేడియానికి చేరుకున్న ఆయనకు జిల్లా మంత్రులు, ఎమ్మెల్యేలు, స్థానిక కాంగ్రెస్‌ నాయకులు ఘనస్వాగతం పలికారు. అనంతరం ఆయన ఇంద్రకీలాద్రి చేరుకుని అమ్మవారిని దర్శించుకున్నారు. మల్లిఖార్జున మహామండపానికి శంకుస్థాపన చేశారు. గుడి అభివృద్థి పనుల ఫోటో ఎగ్జిబిషన్‌ను తిలకించారు. అనంతరం మహిళాసంఘాల సదస్సులో పాల్గొన్నారు. మహిళా సదస్సులో ఆయన డ్వాక్రా మహిళల అనుభవాలు తెలుసుకున్నారు.