కాంగ్రెసుకు బుద్ధి చెప్పారు: కెసిఆర్

హైదరాబాద్‌: కరీంనగర్ ఎమ్మెల్సీగా తమ పార్టీ అభ్యర్థి లక్ష్మణరావును గెలిపించి కాంగ్రెసుకు బుద్ధి చెప్పారని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు అన్నారు. తెలంగాణ రాష్ట్ర ఏర్పాటు ఆకాంక్ష ఎంత బలంగా ఉందో ఈ ఫలితం తెలియజేస్తోందని ఆయన శుక్రవారం మీడియా ప్రతినిధులతో అన్నారు. కాంగ్రెసు మూడో, మూడో స్థానానికి పడిపోయిందని ఆయన అన్నారు. తెలంగాణ పట్టభద్రులు, మేధావులు ఏమనుకుంటున్నారో కరీంనగర్ ఎమ్మెల్సీ ఉప ఎన్నిక రుజువు చేసిందని ఆయన అన్నారు.

కరీంనగర్ శాసనమండలి కరీంనగర్ పట్టభద్రుల నియోజకవర్గానికి జరిగిన ఎన్నికల్లో తెరాస అభ్యర్థి నారదాసు లక్ష్మణరావు ఘన విజయం సాధించారు. తన సమీప బిజెపి ప్రత్యర్థిని తెరాస అభ్యర్థి 11,294 ఓట్ల మెజారిటీతో ఓడించారు. కాంగ్రెసు పరోక్ష మద్దతు పొందిన అభ్యర్థి ఆకారపు భాస్కర్ రెడ్డి మూడో స్థానంలో నిలువగా, తెలుగుదేశం పరోక్ష మద్దతు పొందిన సి. కుమలకుమారి నాలుగో స్థానంలో నిలిచారు. ఈ విజయంతో తెరాస శిబిరంలో ఆనందోత్సాహాలు వెల్లి విరుస్తున్నాయి. పార్టీకి నైతిక బలం చేకూరింది.