పవన్ నేనూ పోటీ చేయం: నాగబాబు

నెల్లూరు :తమ్ముడు పవన్‌ కళ్యాణ్‌ గానీ, తానుగానీ ఎన్నికల్లో పోటీచేసే అవకాశాలు తొంభై తొమ్మిది శాతం లేవని చిరంజీవి సోదరుడు నాగేంద్రబాబు స్పష్టంచేశారు. అయితే, పరిస్థితుల దృష్ట్యా అధిష్ఠానం ఆదేశిస్తే మిగలిన ఒక్క శాతం ఆలోచిస్తామన్నారు. శుక్రవారం ఆయన నె ల్లూరు, రూరల్‌ నియోజకవర్గ నాయకులు,కార్యకర్తలతో సమీక్ష సమావేశం నిర్వ హించారు. ఈ సందర్భంగా 'మీ తల్లి సొంత ప్రాంతమైన నెల్లూరు నుంచి పోటీ చేయండి' అంటూ స్థానిక నేతలు నాగబాబును కోరగా ఆయన వారి అభ్యర్థనను ఆయన సున్నితంగా తిరస్కరించారు.

ప్రజా సేవ, వారి సమస్యల పరిష్కారమే పరమావధిగా అన్నయ్య రాజకీయాల్లోకి వచ్చారని, పార్టీని పటిష్ఠం చేసేందుకే సా మాన్య కార్యకర్తగా తాను ముందుకొచ్చానని చెప్పారు. తానూ పోటీచేస్తే ప్రజారాజ్యం కూడా వారసత్వపు పార్టీగా మారిపోతుందని వ్యాఖ్యానించారు. పార్టీ లో తమకు ప్రాధాన్యం పెంచాలని చిరంజీవి అభిమాన సంఘాల నాయకులు కోరారు. కాగా, టికెట్ల కేటాయింపులో అందరికీ న్యాయం జరగకపోవచ్చునని, పార్టీ అధికారంలోకి వస్తే అందుకు కృషిచేసిన నాయకుల సేవలకు మంచి ఫలితం ఉంటుందని హామీ ఇచ్చారు.