'బిగ్ ఫిష్'కు బెయిల్ నిరాకరణ

విజయవాడ: ఎసిబి వలలో చిక్కుకున్న మత్స్యశాఖ ఇంజినీర్ వెలుగుబంటి సూర్యనారాయణకు బెయిల్ ఇవ్వడానికి ఎసిబి కోర్టు మంగళవారం నిరాకరించింది. దీనితో ఈ పెద్ద చేప మరికొంత కాలం జైల్లో గడపవలసి ఉంటుంది. సూర్యనారాయణ ఆస్తులు లెక్కకు మించి ఉండడంతో ఎసిబి ఆయన కోసమే ఒక ప్రత్యేక విభాగాన్ని పెట్టవలసి వచ్చింది. సూర్యనారాయణ ఆస్తులు వంద కోట్లు కాదని, 250 కోట్ల వరకు ఉండవచ్చని ప్రముఖ ఆంగ్ల దినపత్రికలో నేడు వచ్చిన కథనం ప్రభుత్వ ముఖ్యుల్లో కలవరం కలిగిస్తోంది.

ఎన్నికల ముందు ఇంత పెద్ద కుంభకోణం బయటపడడం, సూర్య నారాయణకు మంత్రులు, సీనియర్ ఐఎఎస్ అధికారులు సహకరించారని ఆరోపణలు రావడంతో వైఎస్ ప్రభుత్వంపై నీలి నీడలు కమ్ముకున్నాయి. ప్రతిపక్షాలకు ఇది పెద్ద అస్త్రంగా మారింది. సూర్యనారాయణ వ్యవహారం కేంద్ర ఎన్నికల సంఘం, సిబీఐ దృష్టికి కూడా వెళ్ళినట్టు తెలుస్తోంది. సూర్యనారాయణ బయటికి వస్తే మంత్రులు, అధికారుల పేర్లు బయటికి వస్తాయన్న భయం వైఎస్ సర్కారుకు పట్టుకుంది. అందువల్ల కేసును నీరు గార్చే ప్రయత్నాలు జరుగుతున్నాయని ఆరోపణలు వస్తున్నాయి.