సిఎం అల్లుడిపై న్యూసెన్స్ కేసు

హైదరాబాద్: ముఖ్యమంత్రి వైఎస్ రాజశేఖరరెడ్డి అల్లుడు, సువార్తీకుడు బ్రదర్ అనిల్ కుమార్ పై నల్గొండ జిల్లా సూర్యాపేటలో న్యూసెన్స్ కేసు నమోదైంది. త్రినగర క్రిస్మస్ వేడుకల సందర్భంగా ఆదివారం రాత్రి 10 గంటల తర్వాత ప్రసంగించినందుకు ఈ కేసు నమోదైంది. సుప్రీంకోర్టు ఉత్తర్వుల ప్రకారం రాత్రి పది గంటల తర్వాత సభలు జరుపకూడదు. అనిల్ కుమార్ పది గంటల తర్వాత కూడా సభను నిర్వహించడంతో ఆయనపై పబ్లిక్ న్యూసెన్స్ కింది కేసు నమోదు చేసినట్టు తెలిసింది.

గత శనివారం నల్గొండలో ప్రజారాజ్యం పార్టీ అధినేత చిరంజీవి రాత్రి పది గంటల తర్వాత సభ నిర్వహించారని పోలీసులు కేసు నమోదు చేసిన విషయం తెలిసిందే. చిరంజీవి అభిమానుకు నల్గొండ ఎస్పీ ఎదుట గాంధీ గిరి తరహాలో ధర్నా నిర్వహించి అనిల్ కుమార్ పై కూడా కేసు నమోదు చేయాలని డిమాండ్ చేశారు. ముఖ్యమంత్రి అల్లుడిపై కేసు అంటే చిన్న విషయం కాదు కాబట్టి ఎస్పీ తన పెద్ద బాసులతో చర్చించి, చివరికి హైదరాబాద్ నుంచి వచ్చిన ఆదేశాల మేరకు ఆయన మీద కేసు నమోదు చేసినట్టు తెలిసింది.