జైలుకు సత్యం బ్రదర్స్

హైదరాబాద్‌: సత్యం కంప్యూటర్స్‌ మాజీ ఛైర్మన్ బి.రామలింగరాజు, ఆయన సోదరుడు రామరాజులను హైడ్రామా నడుమ శనివారం సాయంత్రం నగరంలోని చంచల్‌గూడ జైలుకు తరలించారు. రూ.7 వేల కోట్ల ఆర్థిక అవకతవకలకు సంబంధించిన కేసులో వారికి హైదరాబాద్‌ ఆరో మెట్రోపాలిటన్‌ మేజిస్ట్రేట్‌ ఈ నెల 23 దాకా జ్యుడిషియల్‌ కస్టడీ విధించారు. శుక్రవారం రాత్రి మొదలైన పరిణామాలు శనివారం సాయంత్రం సత్యం బ్రదర్స్‌ను మారేడ్‌పల్లిలోని మేజిస్ట్రేట్‌ నివాసానికి.. అక్కడి నుంచి చంచల్‌గూడ జైలుకు తరలించేవరకూ కొనసాగాయి.

మరో వైపు.. సీఐడీ తన దర్యాప్తును ముమ్మరం చేసింది. సత్యం కార్యాలయంలోని కీలక పత్రాలను స్వాధీనం చేసుకుంది. ముఖ్య ఆర్థిక అధికారి (సీఎఫ్‌వో) వడ్లమాని శ్రీనివాస్‌ను అరెస్టుచేసింది. పత్రాల పరిశీలన అనంతరం అక్రమాల్లో పాలుపంచుకున్న డైరెక్టర్లను కూడా అరెస్టుచేసేందుకు రంగం సిద్ధంచేసింది. ఇంకోవైపు.. ఖాతాల అవకతవకలకు సంబంధించి సత్యం సంస్థ ఆడిటింగ్‌ వ్యవహారాలు చూస్తున్న ప్రైస్‌ వాటర్‌హైస్‌ కూపర్స్‌ (పీడబ్ల్యూసీ)కి భారత ఛార్టర్డ్‌ అకౌంటెంట్ల సంస్థ (ఐసీఏఐ) షోకాజ్‌ నోటీసు జారీచేసింది. మూడు వారాల్లో సమాధానమివ్వాలని ఆదేశించింది.