ఒబామా ప్రమాణ స్వీకారం నేడే

వాషింగ్టన్‌: ప్రపంచమంతా ఆసక్తిగా ఎదురు చూస్తున్న క్షణాలు దగ్గరపడ్డాయి. ఈ రోజు(మంగళవారం) అమెరికా అధ్యక్షుడిగా బరాక్‌ హుస్సేన్‌ ఒబామా బాధ్యతలు స్వీకరించనున్నారు. భారత కాలమానం ప్రకారం మంగళవారం రాత్రి 10 గంటల సమయంలో ఆయన ప్రమాణ స్వీకార వేడుకలు ప్రారంభంకానున్నాయి. వాషింగ్టన్‌ డీసీలోని నేషనల్‌ పార్క్‌ మాల్‌లో ప్రమాణ స్వీకార కార్యక్రమం జరుగుతుంది. ఒకప్పుడు అబ్రహం లింకన్‌ ఉపయోగించిన బైబిల్‌పైనే ఒబామా ప్రమాణం చేయనున్నారు.ఈ చారిత్రక ఘట్టం తిలకించటానికి సుమారు 20 లక్షల మంది హాజరవుతున్నట్లు అంచనా.

ఇక ప్రమాణ స్వీకారం ముగియగానే...'టీమ్‌ ఒబామా' నేరుగా వైట్‌హౌస్‌కు చేరుకుంటుంది. పదవీ బాధ్యతలకు సంబంధించిన కొన్ని కార్యక్రమాల్లో ఒబామా పాల్గొంటారు. మధ్యాహ్నం నుంచే కొత్త అధ్యక్షుడు పని ప్రారంభించేందుకు అవసరమైన ఏర్పాట్లన్నీ అధికారులు పూర్తి చేసినట్లు తెలుస్తోంది. బుధవారం ఆయన మిలిటరీ కమాండర్లతో సమావేశమై అఫ్ఘాన్‌, ఇరాక్‌ల గురించి చర్చిస్తారు.ఈ సమయంలో మానవ హక్కులకై పోరాడి గెలిచిన మార్టిన్‌ లూథర్‌ కింగ్‌ కు ఒబామా నివాళులు అర్పించనున్నారు. ప్రమాణ స్వీకారం కార్యక్రమంలో భాగంగా... పరేడ్‌, నృత్యాలు, ప్రార్థనలు, ఇతరత్రా వేడుకలు నిర్వహించనున్నారు.