విప్రో నికర లాభంలో వృద్ధి

ముంబై: విప్రో త్రైమాసిక ఫలితాలు విడుదలయ్యాయి. డిసెంబర్‌ 31తో ముగిసిన త్రైమాసానికి విప్రో రూ.1,004 కోట్ల నికర లాభాన్ని ఆర్జించినట్లు సంస్థ ఛైర్మన్‌ అజీమ్‌ ప్రేమ్‌జి ప్రకటించారు. గత ఏడాది ఇదే క్వార్టర్‌లో విప్రో కేవలం రూ.854 కోట్లు కాగా, ఈ త్రైమాసికంలో 3.5 శాతం వృద్ధి సాధించినట్లు ప్రేమ్‌జి గణాంకాలను వెల్లడించారు.

సత్యం అవకతవకలు, సాఫ్ట్‌వేర్‌ ఎగుమతులు క్షీణించిన నేపథ్యంలో విప్రో త్రైమాసిక ఫలితాలు ప్రతికూలంగా ఉండవచ్చని విశ్లేషకులు భావించారు. అయితే ఈ త్రైమాసికానికి తమ చేతిలో నాలుగు భారీ ప్రాజెక్టులు ఉన్నాయని, ఈ త్రైమాసిక ఆదాయం రికార్డు స్థాయిలో రూ. 6,773 కోట్లకు పెరిగిందని ప్రేమ్‌జి ఆశావాహక ఫలితాలను ప్రకటించారు.