కోర్టులో రామలింగరాజు నిరీక్షణ

హైదరాబాద్‌: రామలింగరాజు కస్టడీ గడువు ఈరోజుతో ముగిసింది. ఆయనను విచారించేందుకు తమకిచ్చిన గడువు సరిపోదని మరో మూడు రోజులు గడువు కావాలని సీఐడీ అధికారులు పిటీషన్‌ దాఖలు చేశారు. ఈ పిటీషన్‌పై ఈరోజు నాంపల్లి కోర్టు విచారణ జరపనుంది. రామలింగరాజు న్యాయవాదులు కూడా కౌంటర్‌ పిటీషన్‌ దాఖలు చేయనున్నారు. ఇవికాక రామలింగరాజు బెయిలు పిటీషన్‌ సెబి పిటీషన్లపై కూడా నేడు విచారణ ఉంది. రామలింగరాజుకు సంబంధించిన అన్ని పిటిషన్లను కోర్టు ఈ రోజు మధ్యాహ్నం పన్నెండున్నరకు విచారించనుంది.

ఈ నేపథ్యంలో ఈరోజు ఉదయం రామలింగరాజు, రామరాజు, శ్రీనివాస్‌లను కోర్టులో హాజరుపరిచారు. కోర్టు వద్ద రాజు మద్దతుదారులు ఎలాంటి గలాభా సృష్టించకుండా పోలీసులు భద్రతా ఏర్పాట్లు చేశారు. ఓ పరిధిదాటి ఎవరూ ముందుకు రాకుండా బారికేడ్లు ఏర్పాటుచేశారు. మీడియాను కూడా దగ్గరకు రానివ్వలేదు. ట్రాఫిక్‌ను కూడా నియంత్రించారు.