ఒబామాతో చిరుకు పోలికా? బాబు

విజయనగరం: చిరంజీవి తనను తాను అమెరికా అధ్యక్షుడు ఒబామాతో పోల్చుకోవడం ఎబ్బెట్టుగా ఉందని తెలుగుదేశం పార్టీ అధ్యక్షుడు చంద్రబాబు నాయుడు శుక్రవారం ఇక్కడ ఎద్దేవా చేశారు. కావాలంటే చిరంజీవి సినిమాల్లో ఒబామా వేషం వేసుకోవచ్చని ఆయన చురక అంటించారు. పొత్తులపై చిరంజీవి చేస్తున్న వ్యాఖ్యలు అందని ద్రాక్షపండు పుల్లన అన్నట్లున్నాయని ఆయన అన్నారు. పార్టీలకు సిద్ధాంతాలే బ్రాండు కానీ, వ్యక్తి కాదని చంద్రబాబు నాయుడు అన్నారు.

మహాకూటమిలో సీట్ల సర్దుబాటుకంటే కలిసి పనిచేయటానికే ప్రాధాన్యం ఇస్తామని టీడీపీ అధినేత చెప్పారు. మహా కూటమి నుంచి తెలంగాణ రాష్ట్ర సమితి వైదొలగలేదని ఆయన అన్నారు. తెలుగుదేశం పార్టీ ప్రచారంలో భాగంగా విజయనగరం వచ్చిన ఆయన ఇక్కడ మీడియా సమావేశంలో ప్రసంగించారు.