అమెరికాను ఆడిపోసుకున్న ముషారఫ్

వాషింగ్టన్‌: తీవ్రవాదానికి వ్యతిరేకంగా తాము చిత్తశుద్ధితో ముందుండి పోరాడుతున్నా తమకు ఇతరులతో సమానంగా గౌరవం దక్కటం లేదని పాక్‌ మాజీ అధ్యక్షుడు పర్వేజ్‌ ముషారఫ్‌ ఆవేదన వ్యక్తం చేశారు. అమెరికా పర్యటనలో ఉన్న ఆయన మీడియాకు ఇచ్చిన ఓ ఇంటర్వూలో ఈ వ్యాఖ్యలు చేశారు. తమ దేశ సరిహద్దులో జరుగుతున్న దాడులు ప్రజలందరి మనస్సులను గాయపరుస్తున్నాయని ఆయన అన్నారు.

అయితే ఆ పేరుతో అమెరికా తమ దేశంలో మిసైల్‌ దాడులు జరపటం కూడా ప్రజలను గాయపరిచిందని అన్నారు. తీవ్రవాదంపై పోరుకు అమెరికా తమకు అందిస్తున్న సాయం ఏ మూలకూ చాలటం లేదన్నారు. ఒబామా అధ్యక్షుడయ్యాక మీ ప్రభుత్వంతో వ్యవహరించే తీరులో మార్పు వస్తుందని భావిస్తున్నారా అని అడగగా ఏ దేశంలోనైనా మొత్తం దేశ ప్రయోజనాలను దృష్టిలో ఉంచుకుని విధానాలు రూపొందుతాయని, వ్యక్తులు మారినంత మాత్రాన అవి మారతాయని తాను అనుకోవటం లేదని అన్నారు.