మీసం మేలేసి తొడ కొట్టిన బాలయ్య

కర్నూలు: కర్నూలు జిల్లా రోడ్ షోలో సినీ నటుడు బాలకృష్ణ మీసం మెలేసి తొడగొట్టారు. అవినీతిమయ కాంగ్రెస్ ప్రభుత్వాన్ని ఓడించాలని, ఓటు హక్కుతో కాంగ్రెసును చంపేయాలని ఆయన ప్రజలకు పిలుపునిచ్చారు. ఆయన రోడ్ షో మంగళవారంనాడు కర్నూలు జిల్లాలో సాగింది. ఉపాధి హామీ పథకం, సబ్సిడీ పథకాల్లో కాంగ్రెసు అవినీతి పాల్పపడుతోందని, ప్రజలను మభ్య పెడుతోందని ఆయన విమర్శించారు. రాష్ట్రాన్ని కాంగ్రెస్ దోచుకు తింటోందని ఆయన అన్నారు. జన్మభూమి స్ఫూర్తి ప్రదాత తెలుగుదేశం పార్టీ అధ్యక్షుడు నారా చంద్రబాబునాయుడును ముఖ్యమంత్రిని చేయాలని ఆయన ప్రజలను కోరారు.

కాంగ్రెస్‌ ప్రభుత్వ హయాంలో మత ఘర్షణలు, తీవ్రవాద దాడులతో సామాన్యుడికి భద్రత కరువైందని బాలకృష్ణ ఆవేదన వ్యక్తం చేశారు. దేశంలో ఎక్కడ తీవ్రవాద దాడులు జరిగిన దానికి మూలాలు హైదరాబాద్‌లోనే లభిస్తున్నాయని అన్నారు. తెలుగుదేశం ప్రభుత్వ హయాంలో ఎప్పుడూ మత ఘర్షణలు జరగలేవని ఆయన గుర్తుచేశారు. రైతు పక్షపాతి అని గొప్పలు చెప్పుకుంటున్న వైయస్ ప్రభుత్వం రైతులకు గిట్టుబాటు ధరలు ఎందుకు కల్పించలేకపోతుందని, ఆత్మహత్యలను ఎందుకు నివారించలేకపోతుందని ప్రశ్నించారు. ముస్లింల సంక్షేమానికి కృషిచేసింది తెదేపా ప్రభుత్వమేనని అన్నారు.