హైదరాబాదు షాపులో అగ్ని ప్రమాదం

హైదరాబాద్‌: హైదరాబాదులోని కోఠిలో గల పుష్పాంజలి కాంప్లెక్స్‌లోని ఓ వస్త్ర దుకాణంలో బుధవారం ఉదయం అగ్ని ప్రమాదం సంభవించింది. దీంతో ఆ ప్రాంత మంతా అగ్ని కీలలు ఎగసిపడుతున్నాయి. గతంలో ఇక్కడే ఓ సారి అగ్నిప్రమాదం సంభవించింది. వెంటనే రంగలోకి దిగిన అగ్నిమాపక సిబ్బంది మంటలు ఆర్పేందుకు ప్రయత్నిస్తున్నారు. షార్ట్ సర్క్యూట్ వల్ల అగ్ని ప్రమాదం సంభవించినట్లు భావిస్తున్నారు. ఈ ప్రమాదంతో ఉదయం పూట కోఠీ ప్రాంతంలో ట్రాఫిక్ కు తీవ్ర అంతరాయం కలిగింది. ప్రమాదం సంభవించిన సమయంలో దుకాణం మూసి ఉంది. షట్టర్లను తీయడంలో ఇబ్బందులు ఎదురు కావడంతో మంటలను ఆర్పడం తొలుత కష్టంగా మారింది.