దూరదృష్టి లోపించింది: చంద్రబాబు

హైదరాబాద్‌: 2009-10 సంవత్సరానికి గాను ప్రవేశపెట్టిన ఓట్‌ ఆన్‌ ఎకౌంట్‌ బడ్జెట్‌లో దూరదృష్టి లోపించిందని తెలుగుదేశం పార్టీ అధినేత చంద్రబాబు విమర్శించారు. ఆర్థిక వ్యవస్థ పూర్తిగా దివాళా తీసిందని, అన్ని రంగాల్లో ప్రభుత్వం పూర్తిగా విఫలమైందని, దీనికి ఈరోజు ప్రవేశపెట్టిన బడ్జెటే నిదర్శనమని ఆయన గురువారం మీడియా ప్రతినిధులతో అన్నారు. గత ఐదేళ్లుగా ఈ ప్రభుత్వం కొత్తగా ఒక్క ఉద్యోగాన్ని ఇవ్వలేదని, పైగారాష్ట్రానికి రావల్సిన వోక్స్‌వ్యాగన్‌, ఫ్యాబ్‌సిటీలాంటి ప్రాజెక్టులు ప్రభుత్వ వైఖరి కారణంగా రాకుండా పోయాయని అన్నారు.

ఇష్టానుసారంగా ప్రారంభించిన ప్రాజెక్టులు ప్రభుత్వానికి గుదిబండలుగా మారాయన్నారు. ప్రాజెక్టుల్లో ముడుపులు, అవినీతితో ప్రభుత్వంపై విశ్వసనీయత తగ్గిందన్నారు. 1994లో సంక్షోభంలో ఉన్న రాష్ట్ర ఆర్థిక పరిస్థితిని తాము గాడిలో పెట్టామని గుర్తు చేశారు. ఒకపక్క పెరిగిన అప్పులు పెరిగాయని, రాష్ట్రాన్ని తాకట్టుపెట్టే యత్నాలతో ఆర్థిక వ్యవస్థ దివాళా తీసిందని బాబు విమర్శించారు.