బడ్జెట్ పై విపక్షాల పెదవి విరుపు

హైదరాబాద్: ఆర్థిక మంత్రి కె. రోశయ్య శాసనసభలో ప్రతిపాదించిన బడ్జెట్ పై ప్రతిపక్షాలు పెదవి విరిచాయి. ఇది ఓటాన్‌ ఎకౌంట్‌ మాత్రమేనని, వచ్చే నాలుగు నెలల్లో తాము ఏం చేయబోతున్నామో ప్రభుత్వం చెబుతోందని ఎమ్మెల్సీ చుక్కా రామయ్య అన్నారు. ఇవి ఉత్తహామీల్లాగానే ఉన్నాయని, ఆచరణలో పెట్టేటట్లు కన్పించడం లేదని అభిప్రాయపడ్డారు. రాష్ట్ర ఆర్థికాభివృద్ధి అంచనాలు జోరుగా ఉన్నాయేగానీ, గత నాలుగేళ్ల అభివృద్ధి మాటేమిటని ఆయన ప్రశ్నించారు. కొత్త యూనివర్సిటీలు పెడుతున్నారు కానీ, వాటికి యూనివర్సిటీ లక్షణాలు, సౌకర్యాలే ఉండటం లేదని అన్నారు. ఉపాధ్యాయుల పోస్టులను ఓ వైపు పెంచి, మరోవైపు తగ్గించిన ప్రభుత్వం ఇది అని దుయ్యబట్టారు.

ఇది ఎన్నికలే లక్ష్యంగా పెట్టిన బడ్జెట్‌ అని సిపిఎం శాసనసభ్యుడు గఫూర్ విమర్శించారు. గతంలో ఇచ్చిన హామీలు చెప్పిన మాటలేవీ అమలు కాలేదని, శాసనసభలో ప్రజలను మోసం చేశారని విమర్శించారు. భూసంస్కరణలు, కార్మికుల సంక్షేమం ప్రస్తావన బడ్జెట్‌లో లేదని అభిప్రాయపడ్డారు. గ్రామసేవకుల గురించి కూడా బడ్జెట్‌లో ఒక్కమాటా లేదని, ఎన్నికల కోసం చెప్పిన కట్టుకథలని, ప్రజల సంక్షేమాన్ని మరచిన ప్రసంగమని ఆయన అన్నారు.