రోశయ్య బావిలో కప్ప: నోముల

హైదరాబాద్: శాసనసభా వ్యవహారాల మంత్రి కె.రోశయ్య బావిలో కప్పలా వ్యవహరిస్తున్నారని సిపిఎం శాసనసభా పక్ష నాయకుడు నోముల నర్సింహయ్య వ్యాఖ్యానించారు. వామపక్షాలపై రోశయ్య చేసిన వ్యాఖ్యలపై ఆయన గురువారం మీడియా ప్రతినిధుల సమావేశంలో తీవ్రంగా ప్రతిస్పందించారు. తల పండిన పెద్ద మనిషి రోశయ్యకు మనసు పండలేదని ఆయన అన్నారు. గెలుస్తాననే నమ్మకం లేకనే రోశయ్య శాసనసభా సభ్యత్వానికి రాజీనామా చేసి శాసనమండలికి వెళ్తున్నారని ఆయన వ్యాఖ్యానించారు.

శాసనసభా ఎజెండా అంశం స్పీకరుకే చెప్పడం లేదంటే స్పీకరును అవమానించడం కాదా అని ఆయన ప్రశ్నించారు. ప్రజలు ఈ కాంగ్రెసు భవిష్యత్తును తేల్చి చెబుతారని ఆయన అన్నారు. వామపక్షాల మద్దతుతో కేంద్రంలో అధికారానికి వచ్చి ఆ తర్వాత బోడి మల్లయ్య అంటూ వ్యవహరించారని ఆయన అన్నారు. గతి లేక కాంగ్రెసు ఆ రోజు వామపక్షాల మద్దతు తీసుకుందని ఆయన అన్నారు. సభలో తమ సభ్యులను పోలీసులతో కొట్టించారని ఆయన అన్నారు. తెలంగాణపై కాంగ్రెసు వైఖరి ఏమిటో ముందు తేలాలని, అప్పుడు తమ వైఖరి ఏమిటో చెప్తామని ఆయన అన్నారు.