నేనూ చిరు అభిమానినే: రోజా

తిరుపతి: సినిమాల్లో ఉన్నప్పుడు తాను కూడా చిరంజీవి అభిమానినే అని తెలుగు మహిళ అధ్యక్షురాలు, నటి రోజా అన్నారు. ప్రజారాజ్యం పార్టీని గెలిపిస్తే ప్రజలు మరో ఐదేళ్ల పాటు కష్టాలు ఎదుర్కోవాల్సి ఉంటుందని ఆమె అన్నారు. విజయంపై నమ్మకం లేకనే ప్రజారాజ్యం పార్టీ అధినేత చిరంజీవి రెండు చోట్ల పోటీ చేయాలని అనుకుంటున్నారని ఆమె వ్యాఖ్యానించారు.

చిరంజీవికి ప్రజా సమస్యలపై, రాష్ట్ర సమస్యలపై అవగాహన లేదని, చిరంజీవికి రాజకీయాలు తెలియవని, అటువంటి వ్యక్తికి ఓటేస్తే ప్రజలే కష్టాలు పడతారని, వ్యక్తిగతంగా చిరంజీవిపై విమర్శలు చేయడం లేదని, రాష్ట్ర ప్రజల కోసమే విమర్శలు చేస్తున్నానని ఆమె అన్నారు. ఒక్కసారి చూద్దామని వైయస్ రాజశేఖర రెడ్డికి ఓటేసి ప్రజలు ఐదేళ్లు కష్టాలు పడ్డారని ఆమె అన్నారు. అపర చాణక్యుడైన చంద్రబాబుకు ఓటేయాలని అందరూ అనుకుంటున్నట్లు ఆమె తెలిపారు.