మార్చిలో బాలయ్య, ఎన్టీఆర్ ప్రచారం

హైదరాబాద్‌: తెలుగుదేశం పార్టీ తరఫున బాలకృష్ణ పర్యటన మార్చి 8 నుంచి తడ నుంచి ప్రారంభం కానుంది. తెలుగుదేశం పార్టీలో సెలబ్రిటీలైన ఎన్టీఆర్‌ కుటుంబ సభ్యులు మార్చి నెలలో కోస్తా జిల్లాలలో విస్తృతంగా పర్యటించనున్నారు. బాలకృష్ణ తన రెండో విడత పర్యటనను కోస్తాలో నెల్లూరు జిల్లా తడ నుంచి ప్రారంభిస్తుండగా అబ్బాయి జూనియన్‌ ఎన్టీఆర్‌ మార్చి 12న శ్రీకాకుళం జిల్లా ఇచ్చాపురం నుంచి యాత్ర చేపట్టనున్నారు. బాలకృష్ణ మార్చి 7న హైదరాబాద్‌ నుంచి చెన్నై వెళతారు. 8న ఉదయం హెలికాప్టర్‌లో తడకు చేరుకుంటారు. అక్కడ ఉదయం 11గంటలకు రోడ్‌షో ప్రారంభం అవుతుంది.

మొదటి రోజు సూళ్ల్లూరుపేట, నాయుడుపేట, వెంకటగిరిలలో పర్యటించి రాత్రి అక్కడే బస చేస్తారు. తదుపరి మరో మూడు రోజుల పాటు జిల్లాలో పర్యటించి 11వ తేదీ రాత్రి ప్రకాశం జిల్లాకు చేరుకుంటారు. 12, 13, 14, 15 తేదీల్లో ప్రకాశం జిల్లాలో పర్యటన ఉంటుంది. జూనియర్‌ ఎన్టీఆర్‌ ఇచ్ఛాపురం నుంచి ఈ నెల 12న తన కోస్తా పర్యటనను ప్రారంభిస్తున్నారు. ఎన్టీఆర్‌ రోడ్‌ షోలకు సంబంధించిన షెడ్యూల్‌ను పార్టీ నేతలు త్వరలో ఖరారు చేయనున్నారు.